Pariksha Pe Charcha ಕಾರ್ಯಕ್ರಮದಲ್ಲಿ ಮಾತನಾಡಿದ ಪ್ರಧಾನಿ, ಮೊಬೈಲ್ ಬಳಕೆ, ಗೇಮಿಂಗ್ ವ್ಯಸನ ಮತ್ತು ಡಿಜಿಟಲ್ ಶಿಸ್ತು ಕುರಿತು ಗಂಭೀರ ಎಚ್ಚರಿಕೆ ನೀಡಿದರು. ವಿದ್ಯಾರ್ಥಿಗಳು ತಮ್ಮ ಅಮೂಲ್ಯ ಸಮಯವನ್ನು ವ್ಯರ್ಥ ಮಾಡದೇ, ಜೀವನ ಕೌಶಲ್ಯ ಮತ್ತು ಜ್ಞಾನ ಹೆಚ್ಚಿಸುವತ್ತ ಗಮನಹರಿಸಬೇಕು ಎಂದು ಹೇಳಿದರು.

ಮೊಬೈಲ್ ಹುಚ್ಚು ಬಿಡಿ

ಭಾರತದಲ್ಲಿ ಇಂಟರ್ನೆಟ್ ಡೇಟಾ ಅಗ್ಗವಾಗಿದೆ. ಆದರೆ ಅದನ್ನು ಗೇಮಿಂಗ್ ಅಥವಾ ಸಾಮಾಜಿಕ ಜಾಲತಾಣಗಳಲ್ಲಿ ಅತಿಯಾಗಿ ಬಳಸುವುದು ಭವಿಷ್ಯಕ್ಕೆ ಹಾನಿಕಾರಕ ಎಂದು ಮೋದಿ ಹೇಳಿದರು. ಹಣಕ್ಕಾಗಿ ಗೇಮಿಂಗ್ ಅಥವಾ ಆನ್‌ಲೈನ್ ಜೂಜಾಟದಲ್ಲಿ ತೊಡಗುವುದು ತಪ್ಪು ದಾರಿಯಾಗಿದೆ. ದೇಶದಲ್ಲಿ ಜೂಜಾಟವನ್ನು ಪ್ರೋತ್ಸಾಹಿಸಲಾಗುವುದಿಲ್ಲ ಎಂದು ಅವರು ಸ್ಪಷ್ಟಪಡಿಸಿದರು.

“ಅರೆಮನಸ್ಸಿನಲ್ಲಿ ಓದಿದರೆ ಯಶಸ್ಸು ಸಿಗುವುದಿಲ್ಲ. ಸಂಪೂರ್ಣ ಮನಸ್ಸು ಮತ್ತು ಶ್ರಮವೇ ಸಾಧನೆಗೆ ದಾರಿ,” ಎಂದು ವಿದ್ಯಾರ್ಥಿಗಳಿಗೆ ಕಿವಿಮಾತು ಹೇಳಿದರು.

ಗೇಮ್ ಆಡೋವರಾಗಬೇಡಿ, ಸೃಷ್ಟಿಕರ್ತರಾಗಿ

ಗೇಮಿಂಗ್ ಸಂಪೂರ್ಣ ಕೆಟ್ಟದ್ದು ಅಲ್ಲ. ಅದು ಒಂದು ಕೌಶಲ್ಯ. ಆದರೆ ವಿದ್ಯಾರ್ಥಿಗಳು ಆಟ ಆಡೋವರಾಗಿರದೇ, ಆಟ ಸೃಷ್ಟಿಸುವವರಾಗಬೇಕು ಎಂದು ಪ್ರಧಾನಿ ಹುರಿದುಂಬಿಸಿದರು.

ಹನುಮಂತನ ಸಾಹಸಗಳು, ಅಭಿಮನ್ಯು ಚಕ್ರವ್ಯೂಹ ಭೇದನೆ, ಪಂಚತಂತ್ರ ಕಥೆಗಳು — ಇವುಗಳ ಆಧಾರದಲ್ಲಿ ಭಾರತೀಯ ಮೌಲ್ಯಗಳನ್ನೊಳಗೊಂಡ ಗೇಮ್‌ಗಳನ್ನು ಸೃಷ್ಟಿಸಬಹುದು ಎಂದು ಸಲಹೆ ನೀಡಿದರು. ನಮ್ಮ ಸಂಸ್ಕೃತಿ ಮತ್ತು ಪೌರಾಣಿಕ ಕಥೆಗಳು ವಿಶ್ವದ ಗಮನ ಸೆಳೆಯುವ ಸಾಮರ್ಥ್ಯ ಹೊಂದಿವೆ ಎಂದರು.

ನಿಮ್ಮದೇ ಓದು ಶೈಲಿ ಬೆಳೆಸಿಕೊಳ್ಳಿ

ಪ್ರತಿಯೊಬ್ಬರಿಗೂ ತಮ್ಮದೇ ಆದ ಓದು ಶೈಲಿ ಇರುತ್ತದೆ. ಕೆಲವರು ಬೆಳಿಗ್ಗೆ ಚೆನ್ನಾಗಿ ಓದುತ್ತಾರೆ, ಕೆಲವರು ರಾತ್ರಿ ಹೆಚ್ಚು ಗಮನ ಕೇಂದ್ರೀಕರಿಸಬಲ್ಲರು. “ನಿಮಗೆ ಯಾವುದು ಸೂಕ್ತವೋ ಅದರಲ್ಲಿ ನಂಬಿಕೆ ಇಡಿ. ಆದರೆ ಒಳ್ಳೆಯ ಸಲಹೆಗಳನ್ನು ಸ್ವೀಕರಿಸಿ,” ಎಂದು ಪ್ರಧಾನಿ ಹೇಳಿದರು.

ಅವರು ತಮ್ಮ ಅನುಭವವನ್ನು ಹಂಚಿಕೊಂಡು, ಕಾಲಕ್ರಮೇಣ ತಮ್ಮ ಕೆಲಸ ಮಾಡುವ ಶೈಲಿಯಲ್ಲಿ ಬದಲಾವಣೆ ಮಾಡಿಕೊಂಡಿದ್ದರೂ ಮೂಲತತ್ವವನ್ನು ಬಿಟ್ಟುಕೊಡಲಿಲ್ಲ ಎಂದು ತಿಳಿಸಿದರು.

ಅಂಕಗಳಿಗಿಂತ ಜೀವನ ಕೌಶಲ್ಯ ಮುಖ್ಯ

ಮೋದಿ ಅವರ ಪ್ರಕಾರ, ಜೀವನದಲ್ಲಿ ಎರಡು ರೀತಿಯ ಕೌಶಲ್ಯಗಳಿವೆ — ಜೀವನ ಕೌಶಲ್ಯ ಮತ್ತು ವೃತ್ತಿ ಕೌಶಲ್ಯ. ಇವೆರಡೂ ಜ್ಞಾನದಿಂದ ಪ್ರಾರಂಭವಾಗುತ್ತವೆ. ವಿದ್ಯಾರ್ಥಿಗಳು ಅಧ್ಯಯನ, ವಿಶ್ರಾಂತಿ ಮತ್ತು ಹವ್ಯಾಸಗಳ ನಡುವೆ ಸಮತೋಲನ ಕಾಯ್ದುಕೊಳ್ಳಬೇಕು.

“ಜೀವನವು ಕೇವಲ ಪರೀಕ್ಷೆಗಳ ಬಗ್ಗೆ ಅಲ್ಲ. ಅಂಕಗಳಿಗಿಂತ ವ್ಯಕ್ತಿತ್ವ ಬೆಳವಣಿಗೆ ಮುಖ್ಯ,” ಎಂದು ಹೇಳಿದರು. ಶಿಕ್ಷಕರಿಗೂ ಸಂದೇಶ ನೀಡಿದ ಅವರು, ಕೇವಲ ಪಾಠ್ಯ ವಿಷಯಗಳಲ್ಲದೇ ವಿದ್ಯಾರ್ಥಿಗಳ ಸರ್ವತೋಮುಖ ಬೆಳವಣಿಗೆಯತ್ತ ಗಮನ ಹರಿಸಬೇಕು ಎಂದು ಹೇಳಿದರು.

2047 – ವಿಕಸಿತ ಭಾರತ ನಿಮ್ಮ ಕೈಯಲ್ಲಿ

2047ರಲ್ಲಿ ಭಾರತ ಸ್ವಾತಂತ್ರ್ಯದ 100 ವರ್ಷ ಪೂರೈಸಲಿದೆ. ಆ ಸಮಯದಲ್ಲಿ ಇಂದಿನ ವಿದ್ಯಾರ್ಥಿಗಳು 35–40 ವರ್ಷದವರಾಗಿರುತ್ತಾರೆ. “ವಿಕಸಿತ ಭಾರತ ನಿರ್ಮಾಣಕ್ಕಾಗಿ ನಾನು ಶ್ರಮಿಸುತ್ತಿದ್ದೇನೆ. ನೀವು ಸಹ ನಿಮ್ಮ ಕೊಡುಗೆ ನೀಡಬೇಕು,” ಎಂದು ಪ್ರಧಾನಿ ಕರೆ ನೀಡಿದರು.

ಪ್ರತಿದಿನ ಬಳಸುವ ವಸ್ತುಗಳಲ್ಲಿ ಎಷ್ಟು ವಿದೇಶಿ ವಸ್ತುಗಳಿವೆ ಎಂಬುದನ್ನು ಪರಿಶೀಲಿಸಿ, ಸಾಧ್ಯವಾದಷ್ಟು ಸ್ವದೇಶಿ ಉತ್ಪನ್ನಗಳನ್ನು ಬಳಸಬೇಕು ಎಂದು ಮನವಿ ಮಾಡಿದರು.

AI ಉಪಯೋಗಿಸಿ, ಅವಲಂಬಿತರಾಗಬೇಡಿ

ಕೃತಕ ಬುದ್ಧಿಮತ್ತೆ (AI) ವಿದ್ಯಾರ್ಥಿಗಳಿಗೆ ಸಹಾಯಕ ಸಾಧನ. ಉತ್ತಮ ಪುಸ್ತಕಗಳ ಸಲಹೆ ಪಡೆಯಲು ಅಥವಾ ಕಲಿಕೆಯನ್ನು ಸುಲಭಗೊಳಿಸಲು AI ಬಳಸಬಹುದು. ಆದರೆ ಅದು ಶ್ರಮವನ್ನು ಕಡಿಮೆ ಮಾಡಬಾರದು.

“ತಂತ್ರಜ್ಞಾನ ನಮ್ಮನ್ನು ಶ್ರಮಹೀನರನ್ನಾಗಿಸಬಾರದು. ಡಿಜಿಟಲ್ ಸಾಧನಗಳನ್ನು ಶಿಸ್ತಿನಿಂದ ಬಳಸಿ,” ಎಂದು ಪ್ರಧಾನಿ ಸಲಹೆ ನೀಡಿದರು.

ಭೂತಕಾಲವಲ್ಲ, ಭವಿಷ್ಯವೇ ಮುಖ್ಯ

ತಮ್ಮ ವಯಸ್ಸಿನ ಬಗ್ಗೆ ಮಾತನಾಡುತ್ತಾ, “75 ವರ್ಷ ಪೂರೈಸಿದ್ದೀರಿ” ಎಂದು ಹೇಳಿದಾಗ, “ಇನ್ನೂ 25 ವರ್ಷ ಬಾಕಿ ಇದೆ!” ಎಂದು ಹಾಸ್ಯವಾಗಿ ಪ್ರತಿಕ್ರಿಯಿಸಿದರು.

“ಹಿಂದಿನದನ್ನು ಲೆಕ್ಕ ಹಾಕಬೇಡಿ. ಮುಂದೆ ಉಳಿದಿರುವ ಅವಕಾಶಗಳತ್ತ ಗಮನ ಹರಿಸಿ,” ಎಂದು ವಿದ್ಯಾರ್ಥಿಗಳಿಗೆ ಪ್ರೇರಣಾದಾಯಕ ಸಂದೇಶ ನೀಡಿದರು.